Aro modernoa eta garaikidea

Aro Moderno eta Garaikideko populazinoaren ikerketak hazkunde eta atzerakaden aldien alternatzia eskeitzen deusku. Azken honeek uzta txarren, izurriteen eta gerren eraginagaz markatuak. Hazkunde demografikoa ez da egonkorra izango XX. menderarte.

Ispaster elizaldea zan eta bertako biztanleak, nagusiki, nekazaritzara, abeltzaintzara eta neurri txikiago baten, arrantzara dedikatzen ziran (azken hau Lekeitioko herrialdeagaz lotuta). XVII. mendeko lehen hamarkadetan artoaren laborantzaren sarrerea oso garrantzitsua izan zan, gainerako lurraldearentzat izan zan lez (Ispasterren egin zan laborantzaren lehenengo barria 1614. urtekoa da).

Artoaren laborantzaren garapenagaz erlazinoan, ehokuntzaren gorakadea aitatu behar da, 1630. urtean Ispasterrek lau errota eukitera heldu zalarik. Gainera, elizaldearen lurretan, Bizkaiko Jaurerriak euki eban haize-erroten adibide eskasenetako bat eraiki zan hurrengo mendean: Aixederreko errotea, 1728-1729 urte bitartean eraikita, eta oraindino zutunik ikusi ahal dana.